[wonderplugin_audio id="1"]

מעשה א : אבידת בת המלך (יידיש)

אִין וֶועג הָאבּ אִיךְ דֶער צֵיילְט אַ מַעֲשֶה. וָואס וֶוער עֶס הָאט זִי גֶעהֶערְט הָאט גֶעהַאט אַ הִרְהוּר תְּשׁוּבָה אוּן דָאס אִיז דִי מַעֲשֶה.

אֵיין מָאל אִיז גִעוֶוען אַ מֶלֶךְ, דֶער מֶלֶךְ הָאט גֶיהַאט זֶעקְס זִין אוּן אֵיין טָאכְטֶער. דִי טָאכְטֶער אִיז בַּיי אִים זֵייעֶר חָשׁוּב גִעוֶוען, אוּן עֶר הָאט זִי זֵייעֶר מְחַבֵב גִעוֶוען (כְּלוֹמֶר גִעלִיבְּט) אוּן הָאט זִיךְ מִיט אִיהְר זֵייעֶר מְשַׁעֲשֵׁעַ גִעוֶוען.

אַמָאל אִיז עֶר מִיט אִיר גִעוֶוען אִין אֵיינֶעם אִין עֶפֶּעס אַ טָאג. אוּן אִיז אוֹיף אִיר בְּרוֹגֶז גִעוָוארְן. הָאט זִיךְ אִים אַרוֹס גִיחַאפְּט אַ וָוארְט דֶער נִיט גוּטֶער זָאל דִיךְ אַוֶועק נֶעמֶען. בַּיי נַאכְט אִיז זִי גִיגַאנְגֶען אִין אִיר חֵדֶר אַרַיין. אִין דֶער פְרִיא הָאט מֶען נִיט גִיווּאוּסְט וִויא זִי אִיז, הָאט זִיךְ דֶער פָאטֶער (דְהַייְנוּ דֶער מֶלֶךְ) זֵייעֶר מְצַעֵר גִיוֶוען אוּן אִיז גִיגַאנְגֶען זִי זוּכִן אַהִין אוּן אַהֶער.

אִיז אוֹיף גִשְׁטַאנֶען דֶער שֵנִי לְמַלְכוּת. מַחֲמַת עֶר הָאט גִיזֶען. דֶער מֶלֶךְ הָאט גְרוֹיס צַעַר. אוּן הָאט גִיבֶּעטִן אַז מֶען זָאל אִים גֶעבֶּן אֵיין מְשָׁרֵת מִיט אֵיין פֶערְד. אוּן גֶעלְט אוֹיף הוֹצָאוֹת. אוּן אִיז גִיגַאנְגֶען זִי זוּכִן. הָאט עֶר זִי זֵיעֶר גִיזוּכְט. זֵייעֶר אַלַאנְגֶע צַייט, בִּיז עֶר הָאט זִי גִיפוּנֶען. (הַיינְט דֶער צֵיילְט עֶר וִוי אַזוֹי עֶר הָאט זִי גִיזוּכְט בִּיז עֶר הָאט זִי גִיפוּנֶען) אִיז עֶר גִיגַאנְגֶען אַ לַאנְגֶע צַייט. (אוּן) אִין מִדְבָּרִיוֹת אוּן אִין פֶעלְדֶער אוּן אִין וֶועלדֶער אוּן הָאט זִי גִיזוּכְט זֵייעֶר אֵיין לַאנְגֶע צַייט.

אִיז עֶר גִיגַאנְגֶען (אוּן) אִין מִדְבָּר אוּן הָאט גִזֶען אַווֶעג פוּן דֶער זַייט. הָאט עֶר זִיךְ מְיַישֵׁב גִיוֶוען בַּאֲשֶׁר אִיךְ גֵיי אַזוֹי אַ לַאנְגֶע צַייט אִין דֶער מִדְבָּר אוּן קָאן זִי נִיט גיפִינֶען. לָאם אִיךְ גֵייעֶן אוֹיף דֶעם וֶועג. טָאמֶער וֶועל אִיךְ קוּמֶען צוּ אֵיין יִשׁוּב. אִיז עֶר גִיגַאנְגֶען אַלַאנְגֶע צַייט.

דֶער נָאךְ הָאט עֶר גִיזֶעהן אַ שְׁלָאס אוּן אַסַאךְ חֲיָילוֹת שְׁטֵייעֶן אַרוּם. אוּן דֶער שְׁלָאס אִיז גִיוֶוען זֵייעֶר שֵׁיין, אוּן דִי חַיָילוֹת זֶענֶען אַרוּם גִישְׁטַאנֶען כְּסֵדֶר זֵייעֶר פַיין. הָאט עֶר מוֹרָא גִיהַאט פַאר דִי חֲיָילוֹת. טָאמֶער וֶועלִן זֵיי אִים נִיט לָאזִן אַרַיין גֵיין. הָאט עֶר זִיךְ מְיַישֵׁב גִיוֶוען אִיךְ וֶועל מִיךְ פְּרוּוֶון. אוּן הָאט אִיבֶּער גִילָאזְט דָאס פֶערְד, אוּן אִיז גִיגַאנְגֶען צוּם שְׁלָאס. הָאט מֶען אִים גִילָאזְט. אוּן מֶען הָאט אִים גָאר נִיט מְעַכֵּב גִיוֶוען אוּן עֶר אִיז גִיגַאנְגֶען פוּן אֵיין חֵדֶר צוּם אַנְדֶערִין אוּן מֶען הָאט אִים נִיט גִיוֶוערְט. אִיז עֶר גִיקוּמֶען צוּ אֵיין פַּאלַאץ. הָאט עֶר גִיזֶען. דֶער מֶלֶךְ זִיצְט דָארְט אִין אֵיין קְרוֹין. אוּן אַסַאךְ חַיָילוֹת שְׁטֵייעֶן אַרוּם אִים. אוּן אֵיין סַאךְ שְׁפִּילִן אוֹיף כֵּלִים פַאר אִים אוּן עֶס אִיז דָארְט זֵייעֶר שֵׁיין אוּן פַיין גִיוֶוען. אוּן דֶער מֶלֶךְ אוּן קֵיינֶער פוּן זֵיי הָאט אִים גָאר נִיט גִיפְרֶעגְט.

אוּן עֶר הָאט דָארְט גִיזֶעהן גוּטֶע מַאֲכָלִים. אִיז עֶר גִיגַאנְגֶען אוּן הָאט גִיגֶעסִין. אוּן אִיז גִיגַאנְגֶען אוּן הָאט זִיךְ גִילֵייגְט אִין אֵיין וִוינְקֶעלֶע עֶר זָאל זֶעהן וָואס דָארְטִין וֶועט זִיךְ טוּהְן, הָאט עֶר גִיזֶען דֶער מֶלֶךְ הָאט גִיהֵייסְן מֶען זָאל בְּרֶענְגֶען דִי מַלְכָּה. אִיז מֶען גִיגַאנְגֶען זִיא בְּרֶענְגֶען. אִיז דָארְטִין גִיוֶוען אֵיין גְרוֹיסֶער רַעַשׁ אוּן אֵיין גְרוֹיסֶע שִׂמְחָה, אוּן דִי קַאפֶּעלְיֶעס הָאבֶּן זֵייעֶר גִישְׁפִּילְט אוּן גִיזוּנְגֶען. וַוייל מֶען הָאט גִיבְּרַאכְט דִי מַלְכָּה. אוּן מֶען הָאט אִיר גִישְׁטֶעלְט אֵיין שְׁטוּל. אוּן מֶען הָאט זִי גִיזֶעצְט לֶעבִּין אִים. אוּן דָאס אִיז גִיוֶוען דִי בַּת מֶלֶךְ. אוּן עֶר הָאט זִי גִיזֶען אוּן הָאט זִי דֶער קֶענְט.

נָאךְ דֶעם הָאט דִי מַלְכָּה אֵיין קוּק גִיטָאן אוּן הָאט גִיזֶען אֵיינֶער לִיגְט אִין אֵיין וִוינְקֶעלֶע הָאט זִי אִים דֶער קֶענְט, אִיז זִיא אוֹיף גִישְׁטַאנֶען פוּן דֶער שְׁטוּל אוּן אִיז צוּ אִים גִיגַאנְגֶען אוּן הָאט אִים אָן גִירִירְט, אוּן הָאט אִים גִיפְרֶעגְט קָאנְסְטוּ מִיךְ הָאט עֶר אִיר גִיעֶנְפֶרְט יוֹא. אִיךְ קֶען דִיךְ דוּ בִּיסְט דִי בַּת מֶלֶךְ וָואס אִיז פַאר פַאלִין גִיוָוארִין. הָאט עֶר זִי גִיפְרֶעגְט וִוי קוּמְסְטוּ אַהֶער. הָאט זִי אִים גִיעֶנְפֶערְט וַוייל דֶעם טַאטִין הָאט זִיךְ אִים אַרוֹיס גִיחַאפְּט דָאס וָוארְט (הַיְינוּ אַז דֶער נִיט גוּטֶער זָאל דִיךְ נֶעמֶען) אוּן דָא אִיז דָאס אָרְט וָואס אִיז נִיט גוּט.

הָאט עֶר אִיר דֶער צֵיילְט אַז אִיר פָאטֶער אִיז זִיךְ זֵייעֶר מְצַעֵר. אוּן עֶר זוּכְט זִי כַּמָה וְכַּמָה שָנִים. אוּן הָאט זִי גִיפְרֶעגְט. וִוי אַזוֹי קֶען אִיךְ דִיךְ אַרוֹיס נֶעמֶען. הָאט זִי אִים גִיעֶנְפֶערְט. דוּ קָאנְסְט מִיךְ נִיט אַרוֹיס נֶעמֶען. סַיידִין אַז דוּ זָאלְסְט דִיר אוֹיס קְלוֹיבִּין אֵיין אָרְט אוּן זָאלְסְט דָארְט זִיצִין אֵיין יָאר. אוּן אַגַאנְץ יָאר זָאלְסְטוּ בֶּענְקֶען נָאךְ מִיר זָאלְסְט מִיךְ אַרוֹיס נֶעמֶען, אוּן וֶוען דוּ וֶועסְט הָאבְּן צַייט זָאלְסְטוּ רַק בֶּענְקֶען אוּן וֶועלִין אוּן הָאפִין מִיךְ אַרוֹיס צוּ נֶעמֶען. אוּן זָאלְסְט פַאסְטִין. אוּן אִין דֶעם אוּנְטֶרְשְׁטִין טָאג פוּן דֶעם יָאר זָאלְסְטוּ פַאסְטִין אוּן זָאלְסְט נִיט שְׁלָאפְן דֶעם גַאנְצִין מֵעֵת לְעֵת, אִיז עֶר גִיגַאנְגֶען אוּן הָאט אַזוֹי גִיטָאן.

אוּן צוּם סוֹף יָאר דֶער אוּנְטֶרְשְׁטְן טָאג. הָאט עֶר גִיפַאסְט. אוּן הָאט נִיט גִישְׁלָאפְן. אוּן הָאט זִיךְ אוֹיף גִיהוֹיבְּן. אוּן אִיז אַהִין גִיגַאנְגֶען (הַיְינוּ צוּ דֶער בַּת מֶלֶךְ זִי אַרוֹיס צוּ נֶעמֶען) הָאט עֶר דֶער זֶעהְן אֵיין בּוֹים אוֹף דֶעם בּוֹים הָאבְּן גִיוַואקְסֶען זֵייעֶר שֵׁיינֶע עֶפִּיל. הָאט זִיךְ אִים זֵייעֶר גִיגְלוּסְט אוּן אִיז גִיגַאנְגֶען. אוּן הָאט גִיגֶעסֶען פוּן זֵיי. תֵּיכֶּף וִוי עֶר הָאט גִיגֶעסֶען דֶעם עֶפִּיל. אִיז עֶר אַנִידֶער גִיפַאלְן אוּן עֶס הָאט אִים אָן גִיחַאפְּט אֵיין שְׁלָאף. אוּן הָאט גִישְׁלָאפְן זֵייעֶר אֵיין לַאנְגֶע צַייט הָאט דֶער מְשָׁרֵת אִים גִוֶועקְט. אוּן עֶר הָאט אִים נִיט גִיקָאנְט דֶער וֶועקְן דֶער נָאךְ הָאט עֶר זִיךְ אוֹיף גִיחַאפְּט פוּן דֶעם שְׁלָאף. פְרֶעגְט עֶר דֶעם מְשָׁרֵת. וִוי בִּין אִיךְ אִין דֶער וֶועלְט. הָאט עֶר אִים דֶער צֵיילְט דִי גַאנְצֶע מַעֲשֶׂה. דוּ שְׁלָאפְסְט שׁוֹין זֵייעֶר אֵיין לַאנְגֶע צַייט. עֶס אִיז שׁוֹין כַּמָה שָׁנִים. אַז דוּ שְׁלָאפְסְט. אוּן אִיךְ הָאבּ מִיךְ מְפַרְנֵס גִיוֶוען פוּן דִי פֵּרוֹת הָאט עֶר זִיךְ זֵייעֶר מְצַעֵר גִיוֶוען.

אוּן אִיז אַהִין גִיגַאנְגֶען אוּן הָאט זִי גִיפוּנֶען דָארְט (הַיְינוּ דִי בַּת מֶלֶךְ) הָאט זִי זִיךְ פַאר אִים זֵייעֶר גִיקְלָאגְט אוּן זֵייעֶר זִיךְ מְצַעֶר גִיוֶוען. פוּן אֵיין טָאג וֶועגֶן הָאסְטוּ אָן גִיוָוארְן (כְּלוֹמֶר אִיבֶּער דֶעם וָואס דוּ הָאסְט זִיךְ נִיט גִיקָאנְט אַיין הַאלְטְן אֵיין טָאג. אוּן הָאסְט גִיגֶעסְן דֶעם עֶפִּיל אִיבֶּער דֶעם הָאסְטוּ אָן גִיוָוארְן) וָוארְן דוּ זָאלְסְט גִיוֶוען קוּמֶען אִין דֶעם טָאג וָואלְסְטוּ מִיךְ אַרוֹיס גִינוּמֶען. לוּשְׁמִיר נִיט צוּ עֶסִין אִיז זֵייעֶר אֵיין שְוֶוערֶע זַאךְ. בִּפְרַט דֶעם אוּנְטֶערְשְׁטֶן טָאג. דֶעמָאלְט אִיז זִיךְ דֶער יֵצֶר הָרָע זֵייעֶר מִתְגַבֵּר. עַל כֵּן זָאלְסְטוּ דִיר וִוידֶער אוֹיס קְלוֹיבְּן אֵיין אוֹרְט. אוּן זָאלְסְט וִוידֶער זִיצְן דָארְט אֵיין יָאר. אוּן אִין דֶעם אוּנְטֶרְשְׁטֶן טָאג זָאלְסְטוּ שׁוֹין מֶעגְן עֶסִין. נָאר זָאלְסְט נִיט שְׁלָאפְן. אוּן זָאלְסְט קֵיין וַויין נִיט טְרִינְקֶען כְּדֵי דוּ זָאלְסְט נִיט שְׁלָאפֶען, וָוארִין דֶער עִיקָר אִיז דֶער שְׁלָאף. אִיז עֶר גִיגַאנְגֶען אוּן הָאט אַזוֹי גִיטָאן.

דֶער אוּנְטֶערְשְׁטֶען טָאג אִיז עֶר אַהִין גִיגַאנְגֶען. הָאט עֶר גִיזֶעהְן אֵיין קְוַואל גֵיין. אוּן דִי מַרְאֶה פוּן דֶעם קְוַואל אִיז גִיוֶוען רוֹיט. אוּן דֶער רֵיחַ אִיז גִיוֶוען פוּן וַויין. הָאט עֶר גִיפְרֶעגְט דֶעם מְשָׁרֵת הָאסְטוּ גִיזֶעהְן. דָאס אִיז אֵיין קְוַואל (קֶער צוּ זַיין אִין אִים וַואסֶער) אוּן דִי מַרְאֶה אִיז רוֹיט. אוּן דֶער רֵיחַ אִיז פוּן וַויין. אוּן אִיז גִיגַאנְגֶען אוּן הָאט עֶפֶּעס פַאר זוּכְט פוּן דֶעם קְוַואל. אִיז עֶר תֵּיכֶּף אַנִידֶער גִיפַאלְן אוּן הָאט גִישְׁלָאפְן כַּמָה שָנִים זִיבְּעצִיק יָאר. זֶענֶען גִיגַאנְגֶען אַסַאךְ חֲיָילוֹת מִיט דִי אַוֹבַּאזִין וָואס גֵייעֶן זֵיי נָאךְ. אוּן דֶער מְשָׁרֵת הָאט זִיךְ בַּיי הַאלְטְן פַאר דִי חֲיָילוֹת. נָאךְ דֶעם אִיז גִיגַאנְגֶען אֵיין קַארְטֶע אוּן דָארְט אִיז גִיזֶעסְן דִי בַּת מֶלֶךְ. הָאט זִי זִיךְ גִישְׁטֶעלְט לֶעבֶּן אִים. אוּן אִיז אַרָאפּ גִיגַאנְגֶען. אוּן הָאט זִיךְ גִיזֶעצְט לֶעבֶּן אִים. אוּן הָאט אִים דֶער קֶענְט. אוּן הָאט אִים זֵייעֶר גִיוֶועקְט. עֶר הָאט זִיךְ אָבֶּער נִיט גִיקֶענְט דֶער וֶועקִין, הָאט זִי אָן גִיהוֹיבֶּען צוּ קְלָאגְן אוֹיף אִים. בַּאֲשֶׁר אַזוֹי פִיל אוּן אַזוֹי פִיל יְגִיעוֹת אוּן טֶרְחוֹת. אַזוֹי פִיל יָארְן וָואס דוּ מוּטְשֶׁעסְט דִיךְ אוּן הָארֶעוֶועסְט אַזוֹי לַאנְג כְּדֵי אַז דוּ זָאלְסְט מִיךְ אַרוֹיס נֶעמֶען, אוּן פוּן אֵיין טָאג וֶועגְן וָואס דוּ הָאסְט גִיקָאנְט מִיךְ אַרוֹיס נֶעמֶען. הָאסְטוּ גָאר אָן גִיוָוארִין. אוּן זִי הָאט זֵייעֶר גִיוֵויינְט. זִי הָאט גִיזָאגְט. עֶס אִיז אֵיין גְרוֹיס רַחֲמָנוּת אוֹיף דִיר אוּן אוֹיף מִיר. אַזוֹי אֵיין לַאנְגֶע צַייט וָואס אִיךְ בִּין דָא. אוּן קָאן נִיט אַרוֹיס וְכוּ'. דֶער נָאךְ הָאט זִי גִינוּמֶען אֵיין פַאטְשֵׁיילֶע פוּן דֶעם קָאפּ. אוּן הָאט אוֹיף אִיר אָן גִישְׁרִיבְּן מִיט אִירֶע טְרֶערֶן אוּן הָאט אַנִידֶער גִילֵייגְט לֶעבְּן אִים אוּן אִיז אוֹיף גִישְׁטַאנֶען אוּן הָאט זִיךְ אַרַיין גִיזֶעצְט אִין דֶער קַארְטֶע. אוּן אִיז אַוֶועק גִיפָארְן.

דֶער נָאךְ הָאט עֶר זִיךְ אוֹיף גִיחַאפְּט אוּן הָאט גִיפְרֶעגְט דֶעם מְשָׁרֵת. וִוי בִּין אִיךְ אִין דֶער וֶועלְט, הָאט עֶר אִים דֶער צֵיילְט דִי גַאנְצֶע מַעֲשֵׂה. אוּן אַזוֹי אַסַאךְ חֲיָילוֹת זֶענֶען דוֹרְךְ גִיגַאנְגֶען. אוּן אַז עֶס אִיז דָא גִיוֶוען דִי קַארִיטֶע. אוּן אַז זִי הָאט גִיוֵויינְט אִיבֶּער אִים. אוּן זִי הָאט גִישְׁרִיגְן עֶס אִיז אֵיין גְרוֹיס רַחֲמָנוּת אוֹיף דִיר אוּן אוֹיף מִיר. וְכוּ' כַּנַּ"ל. דֶער וַוייל הָאט עֶר אֵיין בְּלִיק גִיטָאן הָאט עֶר דֶער זֶעהְן דִי פַאטְשֵׁיילֶע לִיגְט לֶעבִּין אִים הָאט עֶר גִיפְרֶעגְט פוּן וַואנֶען אִיז דָאס. הָאט עֶר אִים גִיעֶנְפֶערְט. זִי הָאט עֶס אִיבֶּער גִילָאזְט אוּן הָאט אוֹיף אִיר אָן גִישְׁרִיבְּן מִיט אִירֶע טְרֶערִין הָאט עֶר (אִים) גִינוּמֶען דִי פַאטְשֵׁיילֶע אוּן הָאט זִי אוֹיף גִיהוֹיבְּן אַקֶעגְן דֶער זוּן. הָאט עֶר אָן גִיהוֹיבְּן צוּ זֶעהְן דִי אוֹתִיוֹת הָאט עֶר אִיבֶּער גִילֵיינְט וָואס דָארְט אִיז גִישְׁטַאנֶען אִיר קְלָאגְן אוּן אִיר גִישְׁרֵיי כַּנַּ"ל. אוּן (דָארְט אִיז גִישׁטַאנֶען גִישְׁרִיבֶּן) אַז הַיינְט אִיז זִי שׁוֹין נִיט אִין דֶעם שְׁלָאס (וָואס אוֹיבְן אִיז גִישְׁטַאנֶען) נָאר עֶר זָאל זוּכִין אֵיין גִלְדִינֶעם בַּארְג מִיט אֵיין פֶּערְלִינֶעם שְׁלָאס דָארְט וֶועסְטוּ מִיךְ גִיפִוּנֶען.

הָאט עֶר אִיבֶּער גִילָאזְט דֶעם מְשָׁרֵת אוּן אִיז שׁוֹין אַלֵיין גִיגַאנְגֶען זִי זוּכְן. אוּן אִיז גִיגַאנְגֶען אוּן הָאט זִי גִיזוּכְט כַּמָה שָׁנִים. הָאט עֶר זִיךְ מְיַישֵׁב גִיוֶוען. אַז אִין יִשׁוּב גִיפִינְט זִיךְ בְּוַודְאַי נִיט קֵיין גִילְדֶענֶער בַּארְג אוּן אֵיין פֶּערְלֶענֶער שְׁלָאס. וָוארְן עֶר אִיז גִיוֶוען גְנִיט אִין דִי קְרֹאינִיקֶיס (לַאנְדקַארְט) עַל כֵּן וֶועל אִיךְ גֵיין אִין מִדְבָּרִיוֹת דָארְטְן זוּכִין. אִיז עֶר גִיגַאנְגֶען זִי זוּכִין אִין מִדְבָּרִיוֹת כַּמָה וְכַמָה שָׁנִים.

דֶער נָאךְ הָאט עֶר דֶער זֶעהְן זֵייעֶר אֵיין גְרוֹיסְן מֶענְטְשׁ וָואס דִי גְרֵייס אִיז גִיוֶוען נִיט מֶענְטְשְׁלִיךְ. אוּן הָאט גִיטְרָאגְן אֵיין גְרוֹיסֶען בּוֹים. וָואס אִין יִשׁוּב גִיפִינְט זִיךְ נִיט אַזוֹי אֵיין גְרוֹיסֶער בּוֹים אוּן דֶער מֶענְשׁ הָאט אִים גִיפְרֶעגְט: וֶוער בִּיסְטוּ. הָאט עֶר אִים גִיעֶנְפֶערְט אִיךְ בִּין אֵיין מֶענְשׁ. הָאט זִיךְ דֶער גְרוֹיסֶער מֶענְשׁ פַאר וִוינְדֶערְט. אוּן הָאט גִיזָאגְט אִיךְ בִּין שׁוֹין אַזוֹי אֵיין לַאנְגֶע צַייט אִין דֶער מִדְבָּר הָאבּ אִיךְ קֵיין מָאל דָא נִיט גִיזֶעהְן קֵיין מֶענְשׁ. הָאט עֶר אִים דֶער צֵיילְט דִי גַאנְצֶע מַעֲשֶׁה כַּנַּ"ל. אוּן אַז עֶר זוּכְט אַ גִילְדֶענֶעם בַּארְג אוּן אַ פֶּערְלֶנֶעם שְׁלָאס. הָאט עֶר אִים גִיעֶנְפֶערְט עֶס אִיז בְּוַודְאַי נִיט פַאר הַאנְדֶען אוּן הָאט אִים מַדְחֶה גִיוֶוען אוּן הָאט אִים גִיזָאגְט מֶען הָאט דִיר אַיין גִירֶעט אֵיין נַארִישְׁקֵייט וָוארִין עֶס גִיפִינְט זִיךְ בְּוַודְאַי נִיט הָאט עֶר זֵייעֶר אָן גִיהוֹיבְּן צוּ וֵוינֶען (הַיְינוּ דֶער שֵׁנִי לְמַלְכוּת הָאט זֵייעֶר גִיוֵויינְט אוּן הָאט גִיזָאגְט) עֶס גִיפִוּנְט זִיךְ בְּוַודְאַי יוֹא עֶס מוּז זִיךְ עֶרְגֶעץ גִיפוּנֶען. אוּן עֶר הָאט אִים מַדְחֶה גִיוֶוען (הַיְינוּ דֶער וִוילְדֶער מֶענְשׁ הָאט אִים מַדְחֶה גִיוֶוען אוּן הָאט אִים גִיזָאגְט) מֶען הָאט דִיר אֵיין נַארִישְׁקֵייט אַיין גִירֶעט אוּן עֶר הָאט גִיזָאגְט (דֶער שֵׁנִי לְמַלְכוּת) עֶס אִיז בְּוַודְאַי פַאר הַאנְדְן עֶרְגֶעץ.

הָאט עֶר אִים גִיזָאגְט (דֶער וִוילְדֶער מֶענְשׁ צוּם שֵׁנִי לְמַלְכוּת) נָאךְ מַיין דֵיעָה נָאךְ אִיז דָאס אֵיין נַארִישְׁקֵייט נָאר וַוייל דוּ שְׁפַּארְסְט זִיךְ בְּכֵן אִיךְ בִּין אֵיין מְמוּנֶה אִיבֶּער אַלֶע חַיוֹת וֶועל אִיךְ דִיר צוּ לִיבּ טָאן אוּן וֶועל צוּם אוֹיף רוּפֶען אַלֶע חַיוֹת זֵיי לוֹיפְן אוֹיס גָאר דִי וֶועלְט טָאמֶער וֶועט וִויסִין אֵיינֶע פוּן זֵיי פוּן דֶעם בַּארְג מִיט דֶעם שְׁלָאס הַנַּ"ל. הָאט עֶר צוּם אוֹיף גִירוּפְן אַלֶע חַיוֹת פוּן קְלֵיין בִּיז גְרוֹיס אוּן הָאט זֵיי גִיפְרֶעגְט. הָאבְּן זֵיי אַלֶע גִיעֶנְפֶרְט זֵיי הָאבְּן נִיט גיזֶעהְן. הָאט עֶר אִים גִיזָאגְט זֶעסְטוּ מֶען הָאט דִיר אֵיין נַארִישְׁקֵייט אַיין גִירֶעט אַז דוּ וִוילְסְט מִיךְ פָאלְגִין קֶער דִיךְ אוּם וָוארִין דוּ וֶועסְט בְּוַודְאַי נִיט גִיפִינֶען וָוארִין עֶס אִיז נִיט דָא אוֹיף דֶער וֶועלְט אוּן דֶער שֵׁנִי לְמַלְכוּת הָאט זִיךְ זֵייעֶר גִישְׁפַּארְט אוּן הָאט גִיזָאגְט עֶס מוּז בְּוַודְאַי יוֹא זַיין.

הָאט עֶר אִים גִיזָאגְט (דֶער וִוילְדֶער מֶענְטְשׁ צוּם שֵׁנִי לְמַלְכוּת) אִיךְ הָאבּ אֵיין בְּרוּדֶער אִין דֶער מִדְבָּר אוּן עֶר אִיז אַמְמוּנָה אִיבֶּער אַלֶע עוֹפוֹת טָאמֶער וֵוייסִין זֵיי מַחֲמַת זֵיי פְלִיעֶן הוֹיךְ אִין דֶעם אַוִיר. טָאמֶער הָאבִּין זֵיי גִיזֶעהְן דֶעם בַּארְג מִיט דֶעם שְׁלָאס. זָאלְסְטוּ גֵיין צוּ אִים אוּן זָאלְסְט אִים זָאגִין אַז אִיךְ הָאבּ דִיךְ גִישִיקְט צוּ אִים.

אִיז עֶר גִיגַאנְגֶען כַּמָה וְכַּמָה שָׁנִים אִים זוּכִין הָאט עֶר וִוידֶער גִיפוּנֶען זֵייעֶר אֵיין גְרוֹיסִין מֶענְשׁ כַּנַּ"ל. אוּן הָאט אוֹיךְ גִיטְרָאגִין אֵיין גְרוֹיסִין בּוֹים אוּן הָאט אִים אוֹיךְ אַזוֹי גִיפְרֶעגְט וִוי דֶער עֶרְשְׁטֶער. הָאט עֶר אִים גִיעֶנְפֶערְט דִי גַאנְצֶע מַעֲשֶׂה. אוּן אַז דֶער בְּרוּדֶער הָאט אִים גִישִׁיקְט צוּ אִים. אוּן עֶר הָאט אִים אוֹיךְ מַדְחֶה גִיוֶוען בַּאֲשֶׁר עֶס גִיפִינְט זִיךְ בְּוַודְאַי נִיט. אוּן דֶער שֵׁנִי לְמַלְכוּת הָאט אִים אוֹיךְ זֵייעֶר מַפְצִיר גִיוֶוען עֶס אִיז בְּוַודְאַי יוֹא דָא.

הָאט עֶר אִים גִיזָאגְט אִיךְ בִּין אֵיין מְמוּנָה אִיבֶּער אַלֶע עוֹפוֹת וֶועל אִיךְ זֵיי רוּפְן טָאמֶער וֵוייסִין זֵיי. הָאט עֶר צוּם אוֹיף גִירוּפְן אַלֶע עוֹפוֹת אוּן הָאט אַלֶע גִיפְרֶעגְט פוּן קְלֵיין בִּיז גְרוֹיס. הָאבְּן זֵיי אִים גִיעֶנְפֶערְט זֵיי וֵוייסִין נִיט פוּן דֶעם בַּארְג מִיט דֶעם שְׁלָאס. הָאט עֶר אִים גִיזָאגְט זֶעסְטוּ עֶס אִיז בְּוַדְאַי נִיט דָא אוֹיף דֶער וֶועלְט אַז דוּ וִוילְסְט מִיךְ פָאלְגְן קֶער דִיר אוּם וָוארִין עֶס אִיז בְּוַודְאַי נִיט דָא. אוּן עֶר (דֶער שֵׁנִי לְמַלְכוּת) הָאט זִיךְ זֵייעֶר גִישְׁפַּארְט אוּן הָאט גִיזָאגְט עֶס אִיז בְּוַודְאַי יאָ דָא אוֹיף דֶער וֶועלְט.

הָאט עֶר אִים גִיזָאגְט וַוייטֶער אִין דֶער מִדְבָּר גִעפִינְט זִיךְ דָארְט מַיין בְּרוּדֶער עֶר אִיז אֵיין מְמוּנָה אִיבֶּער אַלֶע וִוינְטְן אוּן זֵיי לוֹיפִין אוֹיס גָאר דִי וֶועלְט טָאמֶער וֵוייסִין זֵיי. אִיז עֶר גִיגַאנְגֶען כַּמָה וְכַמָה שָׁנִים זוּכִין, הָאט עֶר וִוידֶער גִיפוּנֶען אֵיין גְרוֹיסְן מֶענְטְשׁ כַּנַּ"ל. אוּן הָאט אוֹיךְ גִיטְרָאגִין אֵיין גְרוֹיסִין בּוֹים אוּן הָאט אִים אוֹיךְ גִיפְרֶעגְט כַּנַּ"ל. הָאט עֶר אִים אוֹיךְ גִיעֶנְפֶערְט דִי גַאנְצֶע מַעֲשֶׂה כַּנַּ"ל. הָאט אִים דֶער מֶענְשׁ אוֹיךְ מַדְחֶה גִיוֶוען. אוּן דֶער שֵׁנִי לְמַלְכוּת הָאט אִים זֵייעֶר גִיבֶּעטִין. הָאט עֶר אִים גִיזָאגְט עֶר וֶועט אִים צוּ לִיבּ טָאן אוּן וֶועט פוּן זַיינֶעט וֶועגִין צוּם אוֹיף רוּפִין אַלֶע וִוינְטְן אוּן וֶועט זֵיי פְרֶעגְן. הָאט עֶר זֵיי גִירוּפְן. זֶענֶען גִיקוּמֶען אַלֶע וִוינְטְן הָאט עֶר אַלֶע גִיפְרֶעגְט. הָאבְּן זֵיי קֵיינֶער נִיט גִיוואוּסְט פוּן דֶעם בַּארְג מִיט דֶעם שְׁלָאס. הָאט עֶר אִים גִיזָאגְט (דֶער מֶענְשׁ צוּם שֵׁנִי לְמַלְכוּת) זֶעסְטוּ אַז מֶען הָאט דִיר אֵיין נַארִישְׁקֵייט דֶער צֵיילְט. הָאט אָן גִיהוֹיבְּן דֶער שֵׁנִי לְמַלְכוּת זֵייעֶר צוּ וֵויינֶען אוּן הָאט גִיזָאגְט אִיךְ וֵוייס עֶס אִיז בְּוַודְאַי יוֹא דָא.

דֶער וַוייל הָאט עֶר גִיזֶעהְן אַז עֶס אִיז אָן גִיקוּמֶען נָאךְ אֵיין וִוינְט הָאט זִיךְ דֶער מְמוּנָה אוֹיף אִים גִיבֵּייזֶערְט וָואס הָאסְטוּ זִיךְ אַזוֹי פַאר שְׁפֶּעטִיקְט צוּ קוּמֶען אִיךְ הָאבּ דָאךְ גוֹזֵר גִיוֶוען אַז עֶס זָאלְן קוּמֶען אַלֶע וִוינְטְן פַאר וָואס בִּיסְטוּ נִיט גִיקוּמֶען מִיט זֵיי. הָאט עֶר אִים גִיעֶנְפֶערְט אִיךְ הָאבּ מִיךְ פַאר זַאמְט מַחֲמַת אִיךְ הָאבּ בַּאדַארְפְט אָפּ טְרָאגִין אֵיין בַּת מֶלֶךְ צוּ אֵיין גִילְדֶענִים בַּארְג מִיט אֵיין פֶּערְלְנִים שְׁלָאס הָאט עֶר זִיךְ זֵייעֶר דֶער פְרֵייט (הַיְינוּ דֶער שֵׁנִי לְמַלְכוּת הָאט זִיךְ זֵייעֶר דֶער פְרֵייט וָואס עֶר הָאט שׁוֹין זוֹכֶה גִיוֶוען צוּ הֶערִין דָאס וָואס עֶר וִויל).

הָאט גִיפְרֶעגְט דֶער מְמוּנָה אִיבֶּער וִוינְטְן דֶעם וִוינְט וָואס אִיז דָארְטִין טַייעֶר. הָאט עֶר אִים גִיזָאגְט דָארְט אִיז אַלְדִינְג טַייעֶר. הָאט זִיךְ אָן גִירוּפְן דֶער מְמוּנָה אִיבֶּער וִוינְטִין אוּן הָאט גִיזָאגְט צוּם שֵׁנִי לְמַלְכוּת בַּאֲשֶר אַזוֹי אֵיין לַאנְגֶע צַייט וָואס דוּ זוּכְסְט זִי אוּן וִוי פִיל יְגִיעוֹת דוּ הָאסְט גִיהַאט בְּכֵן טָאמֶער וֶועסְטוּ הַיינְט הָאבִּין אַ מְנִיעָה מַחֲמַת גֶעלְט עַל כֵּן וֶועל אִיךְ דִיר גֶעבִּין אַ כֵּלִי אַז וֶוען דוּ וֶועסְט אַרַיין טָאן דִי הַאנְט וֶועסְטוּ פוּן דָארְט אַרוֹיס נֶעמֶען גֶעלְט. אוּן הָאט גֶעהֵייסְן דֶעם וִוינְט אַז עֶר זָאל אִים טְרָאגִין אַהִין אִיז גִיקוּמֶען דֶער שְׁטָארִים וִוינְט אוּן הָאט אִים אַהִין גִיטְרָאגְן. אוּן הָאט אִים גִיבְּרַאכְט צוּם טוֹיעֶר. זֶענֶען דָארְט גִישְׁטַאנֶען חַיָילוֹת אוּן הָאבִּין אִים נִיט גִילָאזְט אִין שְׁטָאט אַרַיין. הָאט עֶר אַרַיין גִיטָאן דִי הַאנְט אִין דֶער כֵּלִי אוּן הָאט אַרוֹיס גִינוּמֶען גֶעלְט, אוּן הָאט זֵיי מְשַׁחֵד גִיוֶוען. אוּן אִיז אַרַיין גִיגַאנְגֶען אִין שְׁטָאט אַרַיין. עֶס אִיז גִיוֶוען אֵיין שֵׁיינֶע שְׁטָאט.

אוּן עֶר אִיז גִיגַאנְגֶען צוּ אֵיין גְבִיר אוּן הָאט זִיךְ אָן גִידוּנְגֶען קֶעסְט. וָוארִין מֶען בַּאדַארְף זִיךְ דָארְטְן פַאר זַאמֶען. וָוארִין מֶען מוּז זֶעהְן מִיט חָכְמָה אוּן שֵׂכֶל מֶען זָאל זִי אַרוֹיס נֶעמֶען (אוּן וִוי אַזוֹי עֶר הָאט זִי אַרוֹיס גִינוּמֶען הָאט עֶר נִישְׁט דֶער צֵיילְט) צוּם סוֹף הָאט עֶר זִי אַרוֹיס גִינוּמֶען אָמֵן סֶלָה.

[tnc-pdf-viewer-iframe file="http://breslevtsfat.com/wp-content/uploads/2016/07/Story-1-Yiddish-מעשה-א-יידיש.pdf" width="750" height="900" download="true" print="true" fullscreen="false" share="false" zoom="true" open="false" pagenav="true" logo="false" find="false" language="he" page="" default_zoom="auto" pagemode=""]